 |
| Mwenyekiti wa Kamati ya Usajili ya Simba, Hans Poppe akizungumza na BIN ZUBEIRY leo asubuhi ofisini kwake, Mbezi |
MWENYEKITI wa Kamati ya Usajili ya klabu
ya Simba, Zacharia Hans Poppe amesema kwamba hawawezi kumuomba radhi Mwenyekiti
wa Yanga, Yussuf Mehboob Manji ili warejeshewe dola za Kimarekani 30,000 wanazodai
kutapeliwa na beki Mbuyu Twite, kwa sababu wanadai haki yao.
Akizungumza leo ofisini
kwake, Mbezi, Tangi Bovu, Dar es Salaam, Hans Poppe ambaye ni Kapteni wa zamani
wa Jeshi la Wananchi Tanzania (JWTZ), alisema kwamba madai ya Manji kutaka kuombwa
radhi, hayahusiani na suala la Twite.
Kauli hiyo, inafuatia kikao cha jana
baina ya klabu hizo mbele ya Kamati ya Sheria, Maadili na Hadhi za Wachezaji ya
Shirikisho la Soka Tanzania (TFF), chini ya Mwenyekiti wake, Alex Mgongolwa, kushindwa
kufikia makubaliano kwa sababu ya Yanga kugoma kulipa fedha, hadi waombwe radhi
na Simba.
Katika kikao hicho kilichoanza majira ya
saa 7:00 mchana, upande wa Yanga uliwakilishwa na Makamu Mwenyekiti wa Yanga,
Clement Sanga na Katibu, Celestine Mwesigwa wakati kwa Simba walikuwepo Makamu
Mwenyekiti, Geoffrey Nyange ‘Kaburu’ na Hans Poppe.
Ikumbukwe, Simba iliwasilisha malalamiko
ya kufanyiwa mchezo usio wa kiungwana na Yanga kwa Twite. Ilidai Twite alisaini
mkataba na klabu yao Agosti 1, mwaka huu mbele yao, viongozi wa Shirikisho la
Soka Rwanda (FERWAFA) na APR na kulipwa dola za Kimarekani 30,000 na nyingine
2,000 za nauli ya kuja Dar es Salaam kujiunga na klabu hiyo. Hata hivyo,
mchezaji huyo akahamia Yanga.
Katika mjadala huo, Simba ilikubali
kurudishiwa fedha zao, lakini viongozi wa Yanga wakasema hawawezi kutoa hadi
waombwe radhi na Mwenyekiti wa Simba, Alhaj Ismail Aden Rage, ambaye alisema
viongozi wa klabu hiyo yenye maskani yake makutano ya mitaa ya Twiga na
Jangwani wana ‘fedha chafu za EPA’.
Simba wakasema kauli yake ya Rage
ilikuwa sehemu ya utani wa jadi, kama ambavyo Yanga walimvalisha jezi Twite
yenye jina la Rage.
Kufikia hapo, Simba wakasema hawawezi
hata kujadili suala la Kevin Yondan na Kamati ya Mgongolwa ikasema itapitia
maelezo ya pande zote, watatoa majibu kwa mujibu wa kanuni na sheria Septemba
10, mwaka huu.
Katika kesi ya Yondan, walalamikaji ni
Simba, ambao wanadai beki huyo alisaini Yanga akiwa bado ana mkataba na klabu
yao.
“Tulikuwa tayari kuzungumza nje ya
utaratibu wa sheria, fedha alizochukua Twite zirudishwe, lakini pia tulitaka kitendo
cha yeye kusaini mara mbili, lazima kikomeshwe, tulitaka kuiachia TFF imfungie,
ili ajue alifanya makosa na kutoa fundisho kwa wachezaji wengine,”alisema Hans
Poppe.
“Lakini katika kikao cha jana, inaonekana
wawakilishi wa Yanga (Sanga na Mwesigwa), hawakuwa na madaraka, kwani pamoja na
kukiri Mbuyu alipewa dola 30,000 na Yanga wakachukua dhamana ya kuzirudisha, baadaye
wakasema wamezungumza na Mwenyekiti wao, Manji, anataka kwanza aombwe radhi,
kwa sababu aliambiwa fedha zake chafu,”.
“Sisi hatuombi fedha kwa Yanga, wala hatuombi
fedha kwa Manji, sisi hatuombi msaada. Tunadai haki yetu, tumeweka pingamizi Mbuyu
asichezee sehemu yoyote hadi arudishe fedha zetu. Sasa wanaopokuja na masharti
ya kuombwa radhi tunashindwa kuwaelewa, na kama ni hivyo waache sheria ichukue
mkondo wake,”alisema.
Hans Poppe alisema kwa kuwa sheria iko
wazi kwamba mchezaji atakayesaini klabu mbili tofauti kwa wakati mmoja, anatakiwa
kufungiwa miaka miwili, hawana wasiwasi na wanasubiri kuona TFF itafanya nini
kwa kuwa hata Yanga wanakiri Mbuyu amesaini Simba na mchezaji mweyewe hajawahi
kukana.
Aidha, Hans Poppe alisema kwamba kama
Yanga hawataki kulipa hizo fedha, badi wawaache Simba watumie njia wanazojua
kumdai mchezaji mwenyewe ili kuhakikisha wanalipa.
No comments:
Post a Comment