Mganga wa kienyeji akutwa na tunguli mahakamani Kisutu

Makachero  wanaofanya upekuzi kwa watu wanaoingia katika Mahakama ya Hakimu Mkazi Kisutu, jijini Dar es Salaam wakati wa usikilizwaji wa kesi inayomkabili Sheikh Ponda Issa Ponda, jana walimkamata mganga wa kienyeji akitaka kuingia na matunguli katika viunga vya mahakama hiyo baada ya kumfanyia upekuzi.

Tukio hilo lilitokea jana mahakamani hapo wakati Makachero hao wakifanya ukaguzi kwa kuwapekua watu walioingia katika viunga vya mahakama hiyo kwa kutumia mashine maalum.

Sheikh Ponda  na wenzake 49, kesi yao ilipangwa kutajwa jana na makachero hao kama kawaida walifanya kazi wakiwa kwenye geti kuu la kuingilia mahakamani hapo.

Saa 2:45  asubuhi mganga huyo, Rajabu Zuberi (30), mkazi wa Kijiji cha Kelege, Muheza mkoani Tanga akiwa na mfuko mkononi, alipita eneo hilo na makachero hao walimzuia na kuanza kumfanyia upekuzi kama watu wengine walivyopekuliwa.

Alipokaguliwa kwa kupitishwa mashine katika mwili wake, kengele ililia ndipo alipotakiwa kufungua mfuko huo waone kilichopo ndani, ulipofunguliwa ndani yake kulikuwa na matunguli na vitu mbalimbali vya uganga wa kienyeji na alipohojiwa kulikoni akajibu mzigo huo alibebeshwa na mama mmoja mfanyabiashara.

“Mwenye mzigo ni Senorina Urassa (35) (baada ya kuona mzigo umekamatwa alikimbilia chooni alifuatwa na kukamatwa), alikiri kumleta mganga huyo mahakamani ili amsaidie katika kesi ya kaka yake, lakini hakumtaja anaitwa nani,” alisema Zuberi.

Ofisa  usalama huyo,  alipohojiwa na NIPASHE kama mganga huyo alikuwa anamfuata mmoja wa washtakiwa katika kesi ya Ponda, alikana kwa kusema kwamba baada ya mahojiano na watuhumiwa walibaini kwamba hawana uhusiano na kesi hiyo.

Wakili wa Serikali Mwandamizi, Tumaini Kweka, alidai mbele ya Hakimu Mkazi Victoria Nongwa anayesikiliza kesi ya Ponda kwamba mshtakiwa huyo ameshindwa kufikishwa mahakamani kwa sababu ni mgonjwa japo hakufafanua anasumbuliwa na maradhi gani.

“Mheshimiwa kesi ilikuja kwa ajili ya kusikilizwa, lakini hatutaweza kuendelea kwa sababu wakili wa utetezi Juma Nassoro hayupo na tumepata taarifa kwamba mshtakiwa wa kwanza, Sheikh Ponda Issa Ponda, kashindwa kufika mahakamani kwa sababu ni mgonjwa...mshtakiwa Ponda amebaki mahabusu na mshtakiwa wa 50 pia ni mgonjwa yuko nyumbani, tunaomba kesi iahirishwe,” alidai Kweka.

Hakimu Nongwa alisema  kesi hiyo itaendelea kusikilizwa Desemba 31, mwaka huu.

Washitakiwa wote wako nje kwa dhamana isipokuwa Ponda na Mukadam Salehe ambao Mkurugenzi wa Mashtaka nchini (DPP) aliwasilisha hati ya kuzuia dhamana yao kwa usalama wao na maslahi ya Taifa.