Tanroads wadaiwa kukwamisha makandarasi

 

Dar es Salaam. Baadhi ya makandarasi wadogo nchini, wamewatuhumu mameneja wa Wakala wa Barabara Tanzania (Tanroads) waliokaa muda mrefu vituo vya kazi kuhusika kuwanyima zabuni.

Hatua hiyo inadaiwa inatokana na mameneja hao kuweka mtandao wa rushwa, kwa wazabuni wakubwa ambao hupewa upendeleo.

Wakizungumza kwa sharti la kutotajwa, makandarasi hao walidai mameneja hao wamekuwa wakihusika kuwanyima zabuni kwa sababu ya kutotoa rushwa. “Ukiangalia mameneja wenye tatizo hilo wengi wamekaa kituo kimoja kwa muda mrefu, hivyo wameweka mtandao wa rushwa hutoa zabuni kwa wakandarasi wakubwa,” alidai mmoja wa makandarasi hao na kuongeza:

“Kungekuwa na kipindi maalumu cha meneja kukaa kituo kimoja, hiyo itasaidia kuvunja mtandao  wa rushwa. Ukiangalia wengine wana zaidi ya miaka saba kituoni.” Makandarasi hao walidai kuwa uozo huo unalindwa na  Mkurugenzi Mkuu wa Tanroads, Patrick Mfugale ambaye ndiye mwenye jukumu la kuwahamisha, lakini tangu ateuliwe hakuna uhamisho ambao wameufanya.

Hata hivyo, Mfugale alikanusha kufahamu taarifa za kuwapo kwa vitendo hivyo vya unyanyasaji na rushwa kwa baadhi ya makandarasi katika mikoa mbalimbali.

“Sina taarifa hizo na kwanza wewe (Mwandishi wa habari) ndiyo unayeniambia, kama zipo wazilete ofisini siyo kuongelea pembeni,” alisema Mfugale na kukata simu. Makandarasi hao walidai wakati wa utawala wa Mkurugenzi Mkuu wa zamani wa Tanroads, Ephraim Mrema mameneja hao walikuwa wakibadilishwa vituo baada ya muda.

“Uhamisho wa mwisho kwa mameneja hao ulifanyika mwaka 2007, wamekaa vituoni mpaka wamezoea. Makandarasi wadogo kama sisi kazi hatupati, wengine wake zao ndiyo walipaji (cashier) wa Tanroads,” alidai kandarasi mwingine na kuongeza: “Fikiria Mzee (mume) ni meneja, mama (mke) ni mlipaji halafu wote hawa wanakaa kituo kimoja zaidi ya miaka nane, nafikiri Waziri wa Ujenzi, Dk John Magufuli anatakiwa kuliangalia hili.”