Wajanja wa Kariakoo waishtua TRA usingizini

Bandari 

Dar es Salaam. Mamlaka ya Mapato Tanzania (TRA) imetangaza rasmi kuanza kwa utaratibu wa kukagua bidhaa zote zinazoingizwa nchini kupitia Bandari ya Dar es Salaam, ili kuhakiki wingi, aina na kiwango cha kodi kinachotakiwa kulipwa.

Hatua hiyo ni utekelezaji wa agizo la Serikali lililotolewa bungeni, June 6 mwaka huu na Waziri wa Fedha, Dk William Mgimwa.

Dk Mgimwa alitoa agizo hilo kufuatia kugundulika kwa mbinu zilizokuwa zikitumiwa na baadhi ya wafanyabiashara, kutoa taarifa za uongo kuhusu bidhaa wanazoingiza kwa lengo la  kukwepa kodi.

Taarifa iliyotolewa jana na Kamishna wa Forodha na Ushuru wa Bidhaa, Tiagi Masamaki ilisema bidhaa zilizokuwa zikiondolewa bandarini bila ukaguzi, sasa zitakaguliwa na ikionekana kuna na taarifa zisizo sahihi hatua za kisheria zitachukuliwa.

“TRA itamchukulia hatua za kisheria mwagizaji au wakala atakayebainika kutoa taarifa za uongo, hatua hizo ni kutaifisha mali, kufuta leseni ya uwakala wa forodha na kushtakiwa,” alisema Masamaki.

Alisema waagizaji wa bidhaa na mawakala wa forodha wanatakiwa kutoa taarifa sahihi kwa TRA kuhusu bidhaa walizoziagiza,  kulipa kodi stahiki kabla ya kufanya ukaguzi ili kukwepa usumbufu.

Alisema ukaguzi  hautazihusisha bidhaa zinazoingizwa nchini kama malighafi za viwandani, bidhaa kwa ajili ya miradi inayogharimiwa na wahisani na mali za balozi mbalimbali nchini.