Hoja ya Sumaye yachochea moto

  *Rais Kikwete: Rushwa inakipeleka Chama cha Mapinduzi pabaya

  *Mbunge asema: �Kujivua gamba� kulishindwa kabla ya utekelezaji

  * Nape ampinga, asema kiwango cha malalamiko ya rushwa ni kidogo

Waziri Mkuu mstaafu, Frederick Sumaye

Hoja ya Waziri Mkuu mstaafu, Frederick Sumaye kuhusu kushamiri kwa rushwa ya mtandao ndani ya Chama Cha Mapinduzi (CCM), inazidi kuungwa mkono ndani ya chama hicho.

Mbunge wa Mwibara mkoani Mara (CCM), Kangi Logora, ameibuka na kusema kushamiri kwa rushwa hiyo ni matokeo ya kushindwa kutekeleza dhana ya ‘kujivua gamba’, iliyoasisiwa na Mwenyekiti wake, Rais Jakaya Kikwete.

“Kujivua gamba kuliondoka hata kabla ya utekelezaji wake,” alisema Lugora, mmoja wa wabunge waliosaini waraka wa Mbunge wa Kigoma Kaskazini (Chadema), Zitto Kabwe, kuhusu kupiga kura ya kutokuwa na imani na Waziri Mkuu, Mizengo Pinda.

Dhana hiyo ilipitishwa na Halmashauri Kuu ya Taifa (Nec) ya CCM katika vikao vyake vilivyofanyika kati ya Aprili 10 na 11, mwaka jana, na kuwataka watuhumiwa kwa ufisadi, kujiondoa kwenye chama hicho vinginevyo wangefukuzwa.

Kujivua gamba kulipata nguvu kubwa ya kuenezwa nchini, kupitia viongozi wa ngazi za juu wa chama hicho akiwemo, Katibu wa NEC, Itikadi na Uenezi wa CCM, Nape Nnauye.

Nnauye alisisitiza kuwepo utekelezaji wa ‘kujivua gamba’ huku akiwatisha watuhumiwa wa ufisadi, kwamba barua zao zipo tayari na kuwataka kuhakikisha wanajiondoa ndani ya chama hicho kabla ya kuondolewa.

Lugora alisema chaguzi ndani ya CCM zilitarajiwa kutoa jawabu la kero ya rushwa na kuibua mtazamo mpya utakaojenga imani ya wananchi kwa chama hicho.

“Tuliratajia chama chetu kirudi kwenye mstari, lakini sasa ni kama tumepoteza mwelekeo, tumekubali kuingia kwenye mtego wa rushwa bila kujiuliza watoa rushwa wanazipata wapi fedha hizo,” alisema.

Lugora alisema hali ilivyo sasa, inaashiria wasiwasi na kuwaacha wanachama waadilifu kutojua nini kitafuata baada ya mafanikio yanayotokana na rushwa.

CCM KUELEKEA SHIMONI 2015

Lugora alisema kutokana na mafanikio yaliyopatikana kupitia matumizi makubwa ya rushwa katika ngazi za chini, ni dhahiri kuwa uchaguzi  wa ngazi ya taifa utatawaliwa na uovu huo.

“Kama wamefanikiwa kujipanga kutokana na nguvu ya rushwa, wakachukua nafasi za ngazi ya chini za uongozi, uchaguzi wa taifa hauwezi kuiepuka rushwa, hii ni hatari kubwa kwa chama chetu,” alisema.

Aliongeza, “bado ninaamini kwamba, kwa yaliyotokea hasa ngazi ya wilaya na mikoa, watu wakachaguliwa kupitia rushwa, hata huko juu (Taifa) hali itakuwa hivyo hivyo.”

Lugora alisema rushwa itakapotumika katika hitisho la uchaguzi ngazi ya taifa, itakuwa ishara ya chama hicho ‘kuzama shimoni’ pindi Uchaguzi Mkuu wa 2015 utakapofanyika.

“Tunakipenda chama chetu, lakini watu waliofanikisha kujipanga kwa kutumia rushwa ili waingie madarakani, wananifanya niamini kwamba 2015 tunaelekea shimoni,” alisema.

NAPE ASEMA MAMBO YAPO SHWARI

Katibu wa Itikadi na Uenezi wa CCM, Nape Nnauye, aliiambia NIPASHE Jumamosi jana kuwa, kiwango cha malalamiko ya rushwa katika chaguzi hizo ni kidogo na kwamba mambo yapo shwari ndani ya chama hicho.

Nape aliyesisitiza kutaka apewe takwimu kuhusu idadi ya malalamiko yaliyotolewa kuhusu rushwa ndani ya chaguzi hizo, alisema suala hilo linakuzwa na vyombo vya habari.

“Tumia mshahara wako vizuri si kukurupuka, fanya utafiti badala ya kusema kuna ongezeko la malalamiko ya rushwa kwa chaguzi za CCM, suala hilo mnalikuza nyie wa vyombo vya habari,” alisema.

Nape alisema CCM imepokea malalamiko kutoka wilaya nane kati ya 161 zilizopo, ikiwemo Hanang’, yaliyowasilishwa na Sumaye, hivyo kuwa kiashiria kwamba mambo ni shwari katika chaguzi hizo.

MHADHIRI UDSM AMKOSOA NAPE

Mhadhiri Mwandamizi wa Chuo Kikuu cha Dar es Salaam, Idara ya Sayansi ya Siasa na Utawala, Dk  Benson Bana, amekosoa kauli ya Nape, akisema hata kama rushwa ingekuwa kwa kiwango cha tone la maji, haifai kuwa sababu ya kujivunia.

Dk Bana alisema rushwa ni adui wa haki na kwamba inapotumika katika chaguzi, inakuwa sehemu yenye kuathiri misingi ya dekomrasia.

Alisema kutokana na hali hiyo, CCM inapaswa `kutoikimbia’ rushwa, bali kuikabili na kuhakikisha inaondoka katika chaguzi zake. “CCM wapiti kanuni na taratibu zao ili kuhakikisha kuwa mianya yote ya rushwa inazibwa,” alisema.

JK: RUSHWA INAIPELEKA CCM PABAYA

Wakati Nape akiamini kuwepo kiwango kidogo cha rushwa kwenye chaguzi za CCM, Mwenyekiti wake, Rais Jakaya Kikwete, ametoa kauli zinazoashiria kukithiri kwa tatizo hilo na athari zake kwa chama hicho.

Rais Kikwete amekaririwa akizungumza katika mikutano ya uchaguzi kwa Jumuiya ya Wanawake (UWT) na Umoja wa Vijana wa CCM (UVCCM) akisema rushwa inayoendelea kujitokeza ndani ya chaguzi hizo, inaweza kukiua chama hicho.

Ingawa kauli hiyo inatofautiana na ile ya Nape, lakini inaunga mkono hoja zilizowahi kutolewa na wana-CCM kadhaa hususan walioshindwa katika nafasi mbalimbali za uongozi, wakilalamikia kushamiri kwa rushwa.

UTABIRI, VILIO KUHUSU RUSHWA NDANI YA CCM

Viongozi waandamizi na wanachama ndani ya CCM, walishakitahadharisha chama hicho, kujipanga ili kukabiliana na matumizi ya ‘fedha chafu’ wakati wa chaguzi za ndani.

Waziri wa Ushirikiano wa Afrika Mashariki, Samuel Sitta, akiwa katika ziara mkoani Kagera hivi karibuni, alitahadharisha kuwepo dalili za rushwa kuathiri chaguzi za chama hicho.

Naye Sumaye, baada ya kushindwa na Waziri wa Nchi Ofisi ya Waziri Mkuu (Uwekezaji na Uwezeshaji), Dk Mary Nagu, aliibua ‘kilio’ cha matumizi ya rushwa ya mtandao ndani ya CCM.

Sumaye aliyekuwa anawania ujumbe wa Nec kupitia wilaya ya Hanang’ mkoani Manyara, alisema rushwa ilitumika kwa kiasi kikubwa kumfanya ashindwe.

Hata hivyo alisema hali hiyo ilijitokeza kwenye maeneo mengine ya nchi, lengo likiwa kuwawezesha viongozi wenye nia ovu kushika madaraka.