Sumaye awaonya urais 2015

  .Awatahadharisha vijana dhidi ya rushwa

Waziri Mkuu Mstaafu, Frederick Sumaye

Waziri Mkuu Mstaafu, Frederick Sumaye, amewatahadharisha vijana kujiepusha na rushwa, hususani inayolenga kununua uongozi wa nchi, ukiwemo urais.

Amesema, ili vijana waishi kwa ustawi na maendeleo wanayostahili, wanatakiwa kukataa mambo machafu yanayofanywa na baadhi ya viongozi, likiwemo la rushwa kipindi cha uchaguzi.

Sumaye alitoa kauli hiyo jana jijini Dar es Salaam katika mdahalo ulioandaliwa na Chuo cha Kumbukumbu ya Mwalimu Nyerere, ikiwa ni adhimisho la miaka 13 baada ya kifo cha Baba wa Taifa, Mwalimu Julius Nyerere.

Pamoja na mambo mengine, washiriki waliangalia moja ya hotuba za Mwalimu Nyerere iliyoelezea, 'nyufa katika Muungano na rushwa.'

Hii ni mara ya pili katika kipindi kisichozidi mwezi mmoja kwa Sumaye kulalamikia rushwa, ikiwa ni baada ya kushindwa katika uchaguzi wa ujumbe wa Halmashauri Kuu ya Taifa (Nec) ya Chama Cha Mapinduzi (CCM).

Kwenye uchaguzi huo kupitia wilaya ya Hanang’ mkoani Manyara, Sumaye alishindwa na Waziri wa Nchi Ofisi ya Waziri Mkuu (Uwekezaji na Uwezeshaji), Dk Mary Nagu.

Sumaye alieleza kushangazwa na baadhi ya wanaotaka kuwania urais (bila kuwataja majina), wakiwatumia vijana kwa kuwapa rushwa ili waweze kuwapigia kura.

"Kwa nini umtumie kijana ukitaka urais, ukiona mtu anazunguka na pesa kutaka uongozi huyo sio kiongozi, ukiona mtu anakununua kwa madaraka ujue naye kanunuliwa na atawahudumia watu waliomnunua, waogopeni watu hawa wapo kwa maslahi yao binafsi na sio ya Taifa," alisema na kuongeza:

"Hii imefanya badala ya kusema huyu ni kiongozi tunayemtaka, tunaishia kusema ana nini, ana fedha au anatoa rushwa, mkifanya hivi mtamuweka mtu asiye na uwezo na sifa madarakani,” alisema.

Alisema hali hiyo inapotokea, raia hasa vijana wanabaki kulalamika bila kujua chanzo ni rushwa iliyotolewa.

“Sio kweli Watanzania wanapenda rushwa na ipo siku watalipuka, sisi tunaopinga rushwa hadharani tunataka Watanzania wasilipuke, vijana mkasimamie haki katika taifa,” alisema.

Alitoa mfano wa chaguzi ndani ya Jumuiya ya Vijana wa CCM (UVCCM), kwamba wenye fedha wamefanikiwa kuwagawa (vijana) kama ilivyokuwa kwa watesi walivyogawana vazi la Yesu Kristu.

Sumaye alisema Mwalimu Nyerere alilisimamia Taifa lakini sasa linateketezwa na kueleza kuwa ipo siku Watanzania watajuta.

Alisema vijana wana nafasi ya kuliokoa Taifa lisiende kubaya zaidi na kuwataka wapige vita rushwa hadharani.

Alihoji, “tujiulize, angefufuka Mwalimu leo, ungekuwa mmoja wa wenye furaha kwenda kumlaki au wataokimbia na kutokomea porini ili uso wake usikutane na wako.”

MATUMIZI MABAYA YA URAIS

Sumaye alisema matumizi mabaya ya taasisi ya urais ni tatizo kubwa Afrika, hivyo kuwa sababu ya machafuko na kutokuridhika kwa wananchi nchi nyingi.

Alisema utawala wa Mwalimu Nyerere ulifanikiwa kutoa elimu ya bure kwa misingi ya usawa, lakinihivi sasa shule za umma zimesahaulika hivyo kutoa kiwango duni cha elimu.

Akielezea kuhusu ajira kwa vijana, alisema Mwalimu Nyerere alipoanzisha elimu ya kujitegemea lengo lake lilikuwa ni Watanzania wasitegemee ajira za maofisini, lakini sasa suala hilo limekuwa kero.

Mkuu wa chuo hicho, Dk. John Magotti, alisema Mwalimu Nyerere alipinga dhuluma, ukandamizaji, ubaguzi wa rangi na aliacha misingi muhimu  utu, uhuru na misingi ya kujitegemea.

CHANZO: NIPASHE