Wapiganaji wa kigeni waingia Mali

Wapiganaji wa Tuareg Kaskazini mwa Mali

Wapiganaji wa kigeni wamewasili katika mji wa Gao Kaskazini mwa Mali, kwa mujibu wa taarifa za meya wa mji huo ambaye yuko uhamishoni.

Taarifa hii inathibitisha ongezeko la wapiganaji wa kiisilamu Kaskazini mwa Mali.

Sadou Diallo amesema kuwa kati ya wapiganaji 60 na 100 raia wa Algeria na wapiganaji wenye asili ya Sahrawis waliingia mjini humo siku nne au tano zilizopita.

Mwenyeji mmoja wa Timbuktu aliambia shirika la habari la AFP kuwa siku ya Jumatatu, wapiganaji wengine kutoka nchini Sudan waliwasili katika eneo hilo mwishoni mwa wiki.

Mipango inaendelea ya serikali za nchi za Ukanda wa Afrika Magharibi, ECOWAS kutatua mzozo huo kijeshi baada ya wapiganaji kutwaa Kaskazini mwa Mali mapema mwaka huu.

Wiki mbili zilizopita, baraza la usalama la Umoja wa mataifa liliipatia shirika la ECOWAS siku arobani na tano kuunda mkakati na kutoa maelezo yake kuhusu mpango wa kutuma wanajeshi 3,000 katika eneo hilo.

Wapiganaji wa kiisilamu wa Tuareg walidhibiti eneo hilo baada ya mapinduzi ya kijeshi mwezi Machi.

Wanajeshi wa Mali walipindua serikali ya Mali baada ya kumtuhumu aliyekuwa Rais kwa kukosa kukabiliana vilivyo na waasi wa Tuareg ambao walianza harakati zao mwezi Januari.

Lakini waasi walianza kutumia pengo lililoachwa la madaraka na kutwaa eneo zima la Mali ikiwemo mji wa
Timbuktu.

Wapiganaji wa kiisilamu ambao sasa wametofautiana na wenzao wa Tuareg, wameanza kutumia sheria za kiisilamu katika maeneo wanayodhibiti. Kuna ripoti za watu kuuawa kwa kupigwa kwa mawe na kukatwa viungo vyao vya mwilini.