Baba aua mwanaye kwa mapanga

Mtoto  Gift Mustafa (4) mkazi wa Yombo Buza wilaya ya Temeke jijini Dar es Salaam, ameuawa kikatili na baba yake baada ya kumkatakata kwa panga wakati akigombana na mkewe.

Tukio hilo lililotokea juzi majira ya saa 1:00 usiku eneo la Buza na kuvuta umati mkubwa wa watu baada ya kuzuka ugomvi baina ya baba yake mzazi aliyejukulikana kwa jina la Mustapha Mchele (37) na mkewe (mama wa mtoto huyo) aliyejulikana kwa jina la Zulfa Mathias (23).

Kwa mujibu wa mashuhuda wa tukio hilo, Gift alipigwa mapanga mara kadhaa ikiwamo kichwani na usoni hadi ubongo ukatawanyika na kufariki papo hapo.

Mashuda hao wanaotaja umri wa mtoto kuwa ni miaka saba, walidai kuwa aliporejea kutoka chuo (madrasa) alisikia baba na mama yake wakigombana na aliita: “Baba baba akitaka kuamualia ugomvi huo,”

Hali hiyo ilimfanya baba yake aliyekuwa na panga kumgeukia na kumcharanga mapanga.

Mashuhuda hao walisema kuwa ugomvi wa wanandoa hao ulikuwa umechukua muda mrefu.

Mashuhuda hao walieleza kuwa, mbali na mtuhumiwa kufanya mauaji hayo, pia alimjeruhi mkewe kwa panga hilo sehemu za mkononi na paji la uso.

Taarifa zaidi zinaeleza kuwa, baada ya mtuhumiwa kufanya tukio hilo, wananchi waliamua kujichukulia sheria mkononi dhidi ya yake kabla ya polisi kufika eneo la tukio na kuwatawanya kwa kufyatua risasi hewani na kufanikiwa kumwokoa.

Akizungumza kwa njia ya simu, Kamanda wa Polisi Mkoa wa Kipolisi Temeke, Englibert Kiondo, alithibitisha kutokea kwa tukio hilo na kusema kuwa mtuhumiwa anashikiliwa na polisi.

Kamanda Kiondo alisema mwili wa marehemu umehifadhiwa katika Hospitali ya Wilaya Temeke, na kwamba mama mzazi wa mtoto huyo amepata matibabu na kuruhusiwa kurudi nyumbani.

Alisema kuwa taarifa ambazo wamezipata kutoka kwa majirani, chanzo cha mkasa huo ni matatizo ya kifamilia, na kusema kuwa polisi bado wanaendelea na uchunguzi.

Kwa upande wao Hospitali ya Temeke walishindwa kutoa taarifa kuhusiana na mwili wa marehemu ambao ulikuwa umehifadhiwa katika Hospitali hiyo baada ya kurushiana mpira kati ya Mganga Mkuu wa Hospitali hiyo na Ofisa habari.

Awali Ofisa habari wa Hospitali hiyo,Joyce Nsumba kupata ufafanuzi juu ya sehemu alizopata majeraha marehemu kabla ya kufariki dunia, lakini alisema kwa wakati huo hakuwa na taarifa kwani alikuwa nje ya ofisi na kumtaka mwandishi asubiri awasiliane na Mganga Mkuu ili kupata taarifa kamili.

Hata hivyo alivyotafutwa kwa mara ya pili alisema atatoa taarifa baada uongozi wa hospitali hiyo kukaa kikao.