Walimu watatu shule moja wafa ajalini

Walimu  watatu na walezi wawili wa wanafunzi katika shule ya Scolastica iliyopo eneo la mji mdogo wa Himo, wilayani Moshi, mkoani Kilimanjaro, wamefariki katika ajali mbaya ya gari mjini humo.

Katika ajali hiyo iliyotokea, pia walimu wanane wamejeruhiwa, baadhi vibaya na wengine kupata majeraha madogo madogo na kutibiwa katika Hospitali ya Rufaa ya KCMC mjini Moshi na

kuruhusiwa.

Ajali hiyo ilitokea Disemba 10, mwaka huu, majira ya saa 2:30 usiku, wakati walimu na walezi hao wakitoka kwenye mazishi ya mwanafunzi wa kidato cha tatu wa shule hiyo, Jackson Kisiri, aliyefariki kwa kugongwa na pikipiki eneo la Kwa Mrefu wilayani Arumeru, mkoani Arusha.

Akizungumza mara baada ya kupatiwa matibabu na kuruhusiwa katika hospitali ya KCMC, Mkuu wa shule hiyo, Marko Shiloli, alisema kwenye gari hilo kulikuwa na walimu kumi, walezi wawili na dereva na kwamba walimu watatu walifariki katika eneo la tukio na walezi hao walikutwa na mauti wakiwa KCMC.

Alisema mwanafunzi huyo alifariki wakati akiwa likizo nyumbani kwao na kwamba walimu na walezi hao walikwenda kwenye mazishi yaliyofanyika Disemba 10, mwaka huu nyumbani kwao.

Kamanda wa Polisi Mkoani Kilimanjaro, Robert Boaz, amethibitisha kutokea kwa ajali hiyo, hata hivyo alisema chanzo halisi hakijafahamika.

Alisema gari lililokuwa na walimu hao lilikuwa likitokea mkoani Arusha kwenda Himo.

Kamanda Boaz alisema ajali hiyo ilihusisha gari lenye namba za usajili T 771 AQD mali ya shule hiyo lililokuwa linaendeshwa na Alexanda Mosha (54), ambalo liligongana ubavu wa kulia na lori aina ya Fuso lenye namba za usajili T 212 AHH likiwa na tela lenye namba za usajili T 653 AAJ likiendeshwa na Omar Abdalah (37).

Alisema ajali hiyo ilitokea karibu na mto Kikavu Chini mahali yalipo makaburi ya raia wa Japan wilayani Hai na kwamba dereva wa gari la shule ya Scolastica anaendelea na matibabu hospitalini.

Mkuu wa shule hiyo aliwataja walimu waliofariki kuwa ni, Julius Kimario (28) wa masomo ya Kiingereza na general study, Joseph Leon Okolot raia wa Kenya wa somo la Historia aliyefariki wakati akifanyiwa upasuaji kutokana na kuvuja damu nyingi na Bernard Amukunyo (30) wa masomo ya Jiografia na Historia raia wa Kenya.

Wengine waliofariki ni Ernest Ambani (48) mlezi wa wanafunzi wa kiume na Nelly Sasaka Deruya raia wa Kenya ambaye alikuwa mlezi wa wanafunzi wa kike shuleni hapo.

Shiloli alisema kwa mujibu wa watu walioshuhudia ajali hiyo, chanzo cha ajali kinaelezwa ni dereva wa gari lao kutaka kulipita gari lililokuwa mbele yake ambalo lilikuwa halionyeshi mwelekeo sahihi kwani mara kwa mara dereva alionyesha ishara ya kusimama na kumruhusu dereva kupita.

“Nilikuwa nimekaa mbele, wakati ajali inatokea nilikuwa nimelala nakumbuka tulikuwa tumeongozana na lori ambalo lilikuwa halieleweki kama linakwenda au la na ndipo dereva akaamua kulipita na wakati akijitahidi kurudi sehemu yake akakutana na lori na kukwaruza gari pembeni ...  nilishtuka watu wakilia na wengine wakiwa nje na kuona waliokufa pale pale watatu … nimeumia kidogo,” alisema.

Mwalimu huyo mkuu alisema ni pigo kubwa kwa shule hiyo kupoteza walimu na walezi hao na kwamba miili yao imeharibika vibaya na inatakiwa kuzikwa mapema kwamba kwa sasa

wanawasiliana na ndugu wa marehemu na kama taratibu zikikamilika watazikwa leo.

Ofisa Habari wa Hospitali ya Rufaa ya KCMC, Gabriel Chisseo, alisema kati ya majeruhi waliofikishwa hospitalini hapo, wawili walifariki wakati wakipata matibabu ambao ni Nelly na Joseph.

Alisema pia walipokea miili ya watu watatu waliokutwa na mauti eneo la tukio na kwamba kati ya majeruhi wanane, watano akiwamo aliyetambulika kwa jina la Peter Mlay  wameruhusiwa kati ya juzi na jana baada ya kupata matibabu na watatu wapo wodi za wagonjwa wa kawaida wakiendelea na matibabu.

Kamanda Boaz aliwataka madereva kufuata sheria za barabarani na abiria kuwa wa kwanza kutoa taarifa juu ya madereva wanaokiuka sheria za usalama barabarani na si kuwa wachochezi wa madereva kuongeza mwendo hasa katika msimu huu wa sikukuu za krismasi na mwaka mpya ambao watu wengi huelekea makwao kwa ajili ya sikukuu hizo.