Matokeo ya uchunguzi kifo cha mwanafunzi hotelini kutolewa leo

Ndugu wa aliyekuwa mwanafunzi wa kidato cha pili katika Shule ya Sekondari Juhudi, Gongo la Mboto, marehemu Jacqueline Matiko, wakitoka katika Hospitali ya Taifa Muhimbili (MNH) jijini Dar es Salaam  mara baada ya uchunguzi wa mwili, uliofanyika juzi.

RIPOTI ya madaktari kuhusu uchunguzi wa sababu za  kifo cha kutatanisha cha Jacqueline Matiko, mwanafunzi wa kidato cha pili katika Shule ya Sekondari Juhudi iliyopo Gongo la mboto, inatarajiwa kutolewa leo.

Mwanafunzi huyo  alikutwa amekufa maji  Januari Mosi mwaka huu katika Hoteli ya Southern Beach, iliyopo Kigamboni jijini Dar es Salaam.

Kulingana na maelezo ya mmoja wa madaktari walioufanyia uchunguzi wa kitabibu mwili wa marehemu juzi katika Hospitali ya Taifa Muhimbili, ripoti hiyo ataiwasilisha polisi kwa ajili ya hatua zaidi.

“Kazi yetu (madaktari) tulimaliza juzi na kesho ripoti itakuwa tayari” alisema daktari huyo ambaye  hata hivyo hakutaka jina lake litajwe kwa maelezo kuwa  si msemaji wa hospitali hiyo.
Pia alisema hawezi kuingia kwa undani kuhusu ripoti hiyo lakini alisema uchunguzi kufuatia  utata juu ya  kifo hicho umekamilika.

Kamanda wa Polisi Temeke, Englebert Kiyondo, alikiri kukutwa kwa mwili wa mwanafunzi huyo na kwamba  kutokana na madai ya ndugu zake, mwili huo umefanyiwa uchunguzi katika Hospitali ya Taifa Muhimbili (MNH) na jeshi lake linasubiri ripoti ya madaktari.

“Tunasubiri ripoti ya madaktari ili tuweze kujua ukweli,” alisema na kuongeza kuwa ni mapema mno kuzungumzia suala hilo.

Alisema utata wa kifo hicho unatokana na baadhi ya wafanyakazi wa hoteli kuwa marehemu alifia katika bwawa la kuogelea.

Baba wa mwanafunzi huyo, Mussa Matiko alithibitisha kupewa taarifa na madaktari waliofanyia uchunguzi mwili wa mwanafunzi huyo kuwa ripoti watapewa leo.

Utata huo unatokana na ndugu wa marehemu ambao walikuwa nao siku ya tukio, kupingana na maelezo ya wafanyakazi wa hoteli hiyo kuwa marehemu alifia katika bwawa la kuogelea na inadaiwa siku ya tukio marehemu alipotea katika mzingira ya kutatanisha akiwa hotelini hapo.

“Alitafutwa sehemu zote bila kuonekana na tulirudi tena kesho yake asubuhi na kuulizia na walitueleza kuwa hajaonekana na hata bwawa wamebadilisha maji na kuweka dawa,” alisema bibi wa marehemu Saida Hussein.

Alisema kuwa walipoondoka katika eneo la hoteli kwa lengo la kwenda hospitali tofauti kumtafuta, walikutana na baba wa mtoto katika Kivuko cha Kigamboni na kurudi tena hotelini.

Alisema katika eneo hilo waliwakuta askari polisi huku mwili wa marehemu ukiwa umefunikwa kwa shuka, pembeni ya bwawa la kuogelea.

 

“Inashangaza wenzangu walikuja wakaambiwa hajaonekana lakini tuliporudi tena baadaye, bila kutarajiwa tukaukuta mwili. huku askari polisi wakiwa wameitwa kuja kuuchukua,”Musa Matiko.

Baadhi ya kinamama ambao walishiriki katika kuosha mwili wa marehemu mwanafunzi huyo waliliambia Mwananchi kuwa kuna kila dalili kuwa binti alibakwa kisha kunyongwa kwani shingo yake ilikuwa imevimba na pia alikuwa na michubuko sehemu za siri.

“Amebakwa kisha akanyongwa hilo halina ubishi ila tusubiri ripoti za daktari,” alidai bibi wa mtoto huyo, Saida wakati anatoka katika chumba cha kuhifadhi maiti katika Hospitali ya Muhimbili baada ya kuosha mwili wa marehemu, ambaye alizikwa katika makaburi ya Gongolamboto, mwishoni mwa wiki iliyopita.