'Mikopo chanzo kingine ukahaba kwa wanafunzi'

Mikopo duni inayotolewa na Bodi ya Mikopo ya Wanafunzi wa Elimu ya Juu (HESLB), imetajwa kuwa ni moja ya mambo yanayochangia wanafunzi wa kike kujihusisha na vitendo vya ukahaba.

Mkurugenzi wa Shule ya Sekondari St. Mathew, Thadei Mutembei, alisema hayo alipozungumza na NIPASHE, juzi jijini Dar es Salaam.

Alisema serikali inapasa kuliangalia kwa makini suala hilo, kwani mikopo wanayopata wanafunzi hao ni midogo, ambayo haitoshelezi mahitaji yao muhimu.

Mutembei alisema wanafunzi hao si kama wanapenda ‘kujiuza’, bali wanalazimika kufanya hivyo kutokana na ugumu wa maisha na kwamba, mikopo, ambayo wanapata imekuwa haiwatoshelezi.

Aliiomba serikali kuwapa kipaumbele watoto, ambao wazazi au walezi wao wana kipato duni katika mikopo, kwani hao ndio ambao wanataabika zaidi, hivyo wanahitaji msaada mkubwa na kwamba, wale wenye uwezo waachwe wajisomeshe wenyewe.

Pia aliiomba serikali kutoangalia shule anayotoka mwanafunzi wakati wa kutoa mikopo, kwani shule si kigezo cha mwanafunzi kupata au kukosa mkopo, badala yake iangalie hali halisi ya maisha ya mwanafunzi.


Katika hatua nyingine, wahitimu wa kidato cha sita wa shule hiyo wameiomba serikali kuweka mitaala madhubuti katika elimu ili kufanya wanafunzi wawe na maendeleo mazuri katika masomo yao.

Walitoa maomba hayo katika mahafali ya nane ya shule huyo kupitia risala yao kwa mgeni rasmi Waziri wa Maliasili na Utalii, Balozi Khamis Kagasheki.

Balozi Kagasheki, ambaye aliwakilishwa na Mkurugenzi wa Wizara hiyo, Dornatus Kamamba, aliahidi kufanyia kazi maombi yaliyotolewa na wanafunzi hao.

CHANZO: NIPASHE