Wakili aomba muda kulipitia faili kesi ya Rais Chama cha Madaktari

 

Rais wa Chama cha Madaktari nchini (MAT), Dk Namala Mkopi 

MAHAKAMA ya Hakimu Mkazi Kisutu jana imeshindwa kuanza kuisikiliza kesi inayomkabili Rais wa Chama cha Madaktari nchini (MAT), Dk Namala Mkopi, baada ya Wakili wa Serikali, Teophil Mutakyawa kuomba muda wa kulipitia jalada.

Mutakyawa alidai  jana ilikuwa ni siku ya kusikiliza kesi hiyo lakini jalada lake lilikuwa halionekani, hivyo aliomba apewe muda wa kulipitia. Hakimu Liwa alikubaliana na maelezo hayo, na kuiahirisha kesi hiyo hadi Februari 21, mwaka huu.

Dk Mkopi anakabiliwa na mashtaka ya kupuuza amri halali ya Mahakama Kuu Kitengo cha Kazi, iliyomtaka atangaze kusitishwa kwa mgomo wa madaktari, kupitia vyombo vya habari.

Kesi hiyo  kwa sasa inasikilizwa na Hakimu, Hellen Liwa baada ya Hakimu aliyekuwa akiisikiliza awali, Chamshana kuhamishiwa Bagamoyo.

Katika kesi hiyo, Dk Mkopi alipandishwa kizimbani mahakamani hapo kwa mara ya kwanza, Julai 10, 2012, na kusomewa mashtaka mawili, ambapo Mwendesha Mashtaka wa Serikali, Tumaini Kweka alidai katika kosa la kwanza, mshtakiwa huyo alidharau amri ya Mahakama Kuu Kitengo cha Kazi iliyomtaka kutangaza kupitia kwenye vyombo vya habari kusitishwa kwa mgomo wa madaktari nchini kote.

Katika shtaka la pili, Wakili Kweka alidai mshtakiwa huyo akiwa Rais wa Chama cha Madaktari aliwashawishi madaktari kuendelea na mgomo wao kinyume cha amri ya Mahakama. Wakati akimsomea maelezo ya awali, Desemba 27, 2012, Wakili Kweka alidai kuwa Juni, 2012, madakatari wanaofanya kazi katika hospitali za umma waliingia katika mgomo, na kwamba mgomo huo uliandaliwa na MAT.

Alidai katika mgomo huo madaktari hao waligoma kutoa huduma za matibabu kwa wagonjwa na shughuli nyingine za kila siku, ambazo ni sehemu ya mkataba wao na Serikali. “Kwa kuwa mgomo huo ulikuwa ni batili, Serikali ilifungua maombi (namba 73 ya mwaka 2012), Mahakama Kuu Kitengo cha Kazi, kwa Chama cha Madaktari,” alidai Wakili Kweka na kuongeza:

“Katika maombi hayo, pamoja na mambo mengine iliomba mahakama itoe zuio la muda kwa MAT na wanachama wake kutokuitisha wala kushiriki katika mgomo, kusubiri uamuzi wa mgogoro uliowasilishwa Mahakama Kuu na Tume ya Usuluhishi na Uamuzi (CMA).