Mawaziri sasa kuchekechwa

 

MAWAZIRI na watendaji wa wizara mbalimbali watakaokuwa wazembe, watachekechwa na kubaki wale ambao utendaji kazi wao ni bora, baada ya kuzinduliwa kwa mpango maalumu wa kupima utendaji wa kazi wa viongozi.

Mpango huo ulizinduliwa jana jijini Dar es Salaam na Rais Jakaya Kikwete na kuhudhuriwa na Makamu wa Rais, Dk Gharib Bilal na Waziri Mkuu, Mizengo Pinda.

Katika nchi za Rwanda na Malaysia, ambako mpango huo unatekelezwa, waziri anaposhindwa kufikia malengo yaliyowekwa katika wizara yake, anahesabika kuwa ameshindwa kazi na hujiuzulu.

Kwa kuanzia, wizara zitakazoanza kutekeleza mpango huo ni Wizara ya Fedha, Wizara ya Kilimo na Chakula, Wizara ya Uchukuzi, Wizara ya Nishati na Madini, Wizara ya Elimu na Mafunzo ya Ufundi na Wizara ya Maji.

Akizungumzia mpango huo, Rais Kikwete alisema kuwa ni busara kwa nchi kujifunza kutoka katika nchi zilizofanikiwa kimaendeleo kama Uingereza, Vietnam na Malaysia, ambazo zinatekeleza mpango huo.

Alisema Uingereza chini ya Waziri Mkuu wa zamani, Goldon Brown, ilianzisha mpango kama huo na ulifanikiwa kwa kiasi kikubwa katika utekelezaji wa miradi ya maendeleo.

“Nchini Malaysia, mpango huu unafanya vizuri zaidi, waziri akishindwa kutekeleza miradi aliyopangiwa, akaitwa kwa waziri mkuu, ina maana ameshindwa kazi na hawezi kuendelea tena kuwa waziri,” alisema Kikwete.

Alisema kuwa mpango huo mpya una lengo la kutoa majukumu kwa kiongozi mmoja, mmoja ili aweze kutoa matokeo mazuri ya kazi zake na kwamba hilo ndilo litakalomfanya aendelee na wadhifa wake.

Katika tukio hilo, mawaziri wa wizara zilizo katika mpango huo walisimama na kuahidi kutekeleza majukumu yao chini ya mpango huo na kwamba hivi sasa watendaji mbalimbali wa wizara hizo wako kwenye mafunzo maalumu kuhusu mpango huo.

Akizungumza, Waziri wa Uchukuzi, Dk Harrison Mwakyembe alisema kuwa mpango huo ukianza kutekelezwa utakuwa kiama kwa viongozi wapenda vyeo, wasiotekeleza majukumu yao ipasavyo.

“Utafika wakati watu watazikataa teuzi za uwaziri kutokana na kazi zitakazokuwa mbele yao. Uongozi utakuwa mzigo mkubwa badala ya sasa watu wanatuambia tumeula tunapoteuliwa kuongoza wizara,” alisema Dk Mwakyembe.

Alisema: “Nchi ambazo mpango huo unatekelezwa, Rais anaweza kuwaomba watu kadhaa wamsaidie kuongoza wizara na wakakataa kwa sababu ya kufahamu kazi ngumu iliyo mbele yao.”