Waendesha bodaboda wengi wa Jiji la D’salaam ni ‘feki’

Pikipiki. 

WAENDESHA pikipiki (bodaboda) wachache wamejitokeza kuchukua leseni maalumu za kusafirisha abiria katika halmashauri za manispaa zao katika Jiji la Dar es Salaam kama ilivyoamriwa na Mamlaka ya Udhibiti Usafiri wa Nchikavu na Majini (Sumatra).

Kwa maneno mengine ni kwamba madereva wengi wa pikipiki wanaosafirisha abiria katika jiji hilo ni feki.

Licha ya wito huo kutolewa na Sumatra tangu mwisho wa mwezi uliopita, ni watu wachache waliojitokeza kuchukua leseni hizo ukilinganisha na mwitikio mzuri ulioonyeshwa na madereva wa magari ya magurudumu matatu (Bajaji).

Akizungumza na gazeti hili, Ofisa Mfawidhi wa Sumatra, Kanda ya Mashariki, Conrad Shio alisema kuwa wamesambaza matangazo maeneo mbalimbali ambayo yanatumika kama vituo vya kuendesha biashara yao ya kuchukua abiria.

Shio alisema kuwa idadi ya leseni zilizotolewa katika Manispaa za Jiji la Dar es Salaam ni kama ifuatavyo; Kinondoni wamesajili bodaboda mbili na bajaji 250, Ilala wamesajili bodaboda tatu na bajaji 17 na Temeke wamesajili bodaboda 18 na bajaji 149 tu.

“Wamejitokeza wamiliki wachache waliokuja kusajili vyombo vyao vya usafiri hasa bodaboda, hivyo wiki ijayo tutafanya operesheni maalumu ya kukamata bodaboda na bajaji ambazo zitakuwa hazijapata leseni za kusafirisha abiria katika Jiji la Dar es Salaam,” alisema Shio.

Ofisa huyo aliongeza kuwa lengo la zoezi hilo ni kuweka udhibiti katika vyombo vya usafiri ili kuwalinda zaidi abiria dhidi ya ajali.