Walalamika ahadi za uchaguzi kutotekelezwa

WAKAZI wa Kata ya Nyamongo mkoani Geita wamewalalamikia viongozi wa Chadema kwa kushindwa kujenga barabara ,shule na zahanati katika Kijiji cha Ilyamchele, Kata ya Nyamongo mkoani Geita kama ilivyowaahidi.

Walisema tangu uchaguzi wa mwaka 2010, mpaka sasa kata yao haijafanya maendeleo yoyote na kwamba ahadi zilizotolewa hazijatekelezwa mpaka sasa.
Lawama hizo zilikuja baada ya wananchi wa kijiji hicho kutoa kero zao katika mkutano wa hazara uliandaliwa na UVCCM mkoa ,ambapo wananchi hao walisema Chadema ilipoingia madarakani iliahidi kutengeneza barabara ,shule na zahanati lakini mpaka leo hata mbunge aliyechaguliwa wala diwani hajawahi kukanyaga katika kijiji hicho.
Wakijibu hoja hizo viongozi wa UVCCM walisema hayo ndiyo matunda ya chama makini walichokichagua,na kusema Chadema wasitumie siasa kudanganya wananchi, na kwamba Chadema haina nia njema na wananchi bali ni uchu tu wa kutaka madaraka.
“Mnaona sasa waliwaahidi watawaletea barabara iko wapi hata sisi wakati tunakuja huku tumechelewa kufika kwasababu ya barabara mbovu imejaa visiki na makorongo halafu mnajiita mna kiongozi bora “alisema Katibu wa UVCCM Mkoa wa Geita, Jonathan Mabihya.

Mabihya alisema kuwa,Chadema walionyesha kuwa wao ni bora zaidi ya chama kilichopo madarakani na CCM ikaamua kuwaruhusu walau wachukue baadhi ya majimbo ili kuona kama kweli wao wanaweza kuongoza nchi, lakini kwa kipindi kifupi tu viongozi hao hao wanaiba fedha za umma ,wanashindwa kutekeleza yale waliyowaahidi wananchi.

“Naomba niwaeleze wananchi wa Ilyamchele huenda mlichagua Chadema kwa kutokujua,mkichagua CCM mtakuwa na uhakika wa maendeleo kuliko Chadema niulizeni kwanini”alihoji Mabihya.
Aliongeza kuwa Chadema haiwezi kujenga barabara,shule wala zahanati katika kijiji chicho kwasababu haina uwezo huo, Awali wananchi waliokuwa katika mkutano huo walisema kijiji hakina shule ya msingi na shule iliyopo ni ya awali ambayo imejengwa kwa udongo.