Kampuni za saruji zadaiwa kutengeneza saruji ya uzito pungufu

 

Watengeneza matofali katika Jiji la Dar es Salaam, wamezilalamikia Kampuni za saruji nchini kwa madai kwamba mifuko ya kilo 50 mara nyingi inakuwa na uzito pungufu tofauti na uliotajwa kwenye mfuko.

Kauli  hiyo ilitolewa kwenye mafunzo ya uhifadhi wa mazingira kwa watengenezaji wa matofali iliyofanyika kwenye Kiwanda cha Saruji cha Twiga (TPCC) yakiwashirikisha watu 50.

Mshiriki wa mafunzo hayo, Mohamed Mkumbo akizungumza kwa niaba ya wenzake alisema  mifuko mingi ya saruji inawafikia ikiwa na uzito pungufu na kutoa mwito kwa kampuni hizo kurekebisha kasoro zinazojitokeza. Akijibu hoja hizo, Meneja Mazingira wa TPCC, Richard Magoda alisema mifuko yote inatoka kiwandani ikiwa na kilo 50.

Magoda alisema wanaopunguza uzito ni wasafirishaji  wakiwamo madereva na wasaidizi wao ama mawakala  wakiwa njiani kuelekea kwa wateja waliohitaji. Alisema vitendo hivyo vinapingwa na kampuni za saruji, lakini wezi hao wanafanya kwa kula njama na madereva ama wauzaji wa jumla ili kuwaibia wateja wa mwisho.

“Kuna wizi unafanywa kwani mifuko yote ya saruji hujazwa katika uzito stahiki wa kilo 50 hadi inapopakiwa kwenye magari ya wasafirishaji, lakini wao wanapokuwa njiani hufanya ujanja ambao wanauoita ‘kupiga bomba’ kwa lengo la kupata faida zaidi” alisema. Magoda alisema tayari kuna mawakala wa usafirishaji kadhaa tumekwisha vunja mikataba nao baada ya kugundulika kuwa wafanyakazi wa magari yao hufanya uchakachuaji huo maarufu kama kupiga bomba.