Manispaa Tabora yatimua watumishi wanne waandamizi

Ni kufuatia tuhuma za ubadhirifu wa mamilioni ya fedha za manispaa hiyo kama zilivyoibuliwa na Mdhibiti na Mkaguzi Mkuu wa Hesabu za Serikali.

Tabora. Halmashauri ya Manispaa ya Tabora, imewafukuza kazi  Mchumi, Mhasibu na Mhandisi wa Ujenzi wa Manispaa hiyo.Orodha hiyo inamjumuisha pia Ofisa Utawala wa Manispaa.
Hatua hiyo imekuja siku kadhaa baada ya Mdhibiti na Mkaguzi Mkuu wa Hesabu za Serikali, kubaini ufisadi wa kutisha katika Manispaa ya Tabora.

Watumishi hao wamefukuzwa kwa tuhuma za ubadhirifu wa fedha wakati wakiwa kazini.
Habari za ndani ya Manispaa ya Tabora, zinasema  watumishi hao sasa wanasubiri kupewa barua zao za kuachishwa kazi. Akizungumza na waandishi wa habari jana, Meya wa Manispaa ya Tabora, Gullamhusein Dewji, alisema watumishi hao, wamefukuzwa kutokana na tuhuma mbalimbali zinazowakabili, ikiwemo ubadhilifu wa mamilioni ya fedha.

Hivi karibuni katika taarifa yake kwa vyombo vya habari, Mdhibiti na Mkaguzi Mkuu wa Hesabu za Serikali, alibaini ufisadi wa zaidi Sh2 blioni katika Manispaa ya Tabora.

Hali hiyo imeisababishia  manispaa hiyo kupata hati chafu, huku Waziri wa Nchi Ofisi ya Waziri Mkuu, Tawala za Mikoa na Serikali za Mitaa, Hawa Ghasia akitangaza kuipunguza ruzuku ya fedha za maendeleo kutoka asilimia 100 hadi 50  katika mwaka huu wa fedha.

Mwaka jana aliyekuwa Mkurugenzi wa Manispaa ya Tabora ambaye alihamishiwa Wilaya ya Uyui, Hadija Makuwani, aliwasimamisha kazi watumishi hao ili kupisha uchunguzi wa tuhuma za ubadhilifu wa fedha na matumizi mabaya ya madaraka.