WABUNGE: TUKO TAYARI KUWEKA WAZI MAJIBU YA UKIMWI

Baadhi ya wabunge wa Bunge la Jamhuri ya Muungano wa Tanzania wamesema wako tayari kuweka wazi majibu ya vipimo vya mambukizi ya virusi vya ugonjwa wa ukimwi (VVU) hata kama watakuwa wameathirika.

Walisema hayo kwa nyakati tofauti jana muda mfupi baada ya uzinduzi wa kitabu cha mwongozo kwa ajili ya kuwawezesha wabunge kupambana dhidi ya Ukimwi, uliofanyika jijini Dar es Salaam.

“Changamoto iliyopo kwenye mabunge yetu ni kwa wabunge kujiweka wazi na kusema mimi hapa nimeathirika. Mimi nikipimwa nikakutwa ninao, niko tayari kujitangaza,” alisema Beatrice Shellukindo, ambaye ni Mbunge wa Kilindi (CCM).

Pia Mbunge wa Muheza (CCM), Herbert Mtangi, alisema yuko tayari kupima afya kwani ni kawaida yake kufanya hivyo.

Aliwataka wabunge wenzake kujiweka wazi iwapo wameathirika wasiogope kwenda kuchukua Dawa za Kuongeza Nguvu (ARVs).

Uzinduzi wa kitabu hicho ulifanyika kwa ushirikiano wa Umoja wa Mabunge Duninai (IPU) na Bunge la Jamhuri ya Muungano wa Tanzania. Jina la kitabu hicho ni ‘Raising the profile of HIV and AIDS in your Parliament’.

Naye Mwenyekiti wa Kamati ya Bunge kuhusu Masula ya Ukimwi, ambaye pia ni Mjumbe IPU, Lediana Mng’ong’o, alisema kitabu hicho kinalenga kuwahamasisha wabunge kushiriki kikamilifu katika vita dhidi ya ukimwi ndani ya mabunge yao na majimboni mwao.

Mbunge wa Bunge la Seneti nchini Ubelgiji, ambaye pia ni Mwenyekiti wa Kamati ya Ushauri kuhusu Masuala ya Ukimwi katika IPU, Marleen Temmerman, aliipongeza Tanzania kwa kuwa mfano baada ya Rais pamoja na wabunge kupima afya zao.

Mgeni rasmi katika uzinduzi huo alikuwa Mwenyekiti wa Bunge, Sylvester Mabumba.

Washiriki walikuwa ni mabalozi, wabunge pamoja na wadau wengine wa kupambana na Ukimwi kutoka nchi mbalimbali duniani.

 Chanzo: Nipashe