Serikali yaondoa fao la kujitoa kwenye Muswada

 

Waziri wa Kazi na Ajira, Gaudentia Kabaka, ameondoa rasmi sehemu inayohusu ‘fao la kujitoa’ kwenye Muswada wa Marekebisho ya Sheria mbalimbali ili kupata muda wa kutosha wa kuandaa na kuleta Muswada wa Sheria utakaokidhi matakwa ya Azimio la Bunge na mahitaji ya kuwa na mfumo endelevu wa Mifuko ya Hifadhi ya Jamii.

Alisema wakati serikali inalifanyia kazi Azimio la Bunge kabla ya kuandaa Muswada wa Sheria kusudiwa, itafanya majadiliano na wadau wote wakiwemo wabunge, vyama vya wafanyakazi, waajiri na wananchi.

Pia alisema watatoa elimu kwa umma kuhusiana na suala la fao la kujitoa na maudhui ya hoja binafsi ya Mbunge wa Kisarawe (CCM), Seleman Jafo, kwa ujumla wake kama yalivyoridhiwa na bunge.

Waziri Kabaka alisema hayo bungeni jana, wakati akisoma kauli ya serikali kuhusu sehemu hiyo.

“Hakuna ubishi kwamba hoja iliyoletwa na kuridhiwa na Bunge ina umuhimu.  Serikali inatambua umuhimu wa Sheria ya Mifuko ya Hifadhi ya Jamii na kwa kuzingatia uzito wa suala la fao la kujitoa pamoja na mapendekezo yaliyojitokeza kwenye hoja ya Jafo,” alisema.

Alisema bunge liliunda kikosi kazi ambacho kimefanya utafiti na kuandaa mapendekezo ili kuona kama kuna manufaa ya kuendelea na mfumo uliopo au kama kunahitajika mfumo mpya kama ilivyokusudiwa.

Alisema baada ya serikali kupitia taarifa ya kikosi kazi imebaini kwamba yapo mambo ya msingi kadhaa ambayo sharti yawe yameshughulikiwa kwanza kwa kina kabla ya kuandaliwa kwa Muswada utakaokidhi matakwa ya hoja ya Jafo kama ilivyoridhiwa na Bunge Agosti, mwaka huu.

“Serikali baada ya kutafakari kwa kina imejiridhisha kuwa kurejesha tu fao la kujitoa kama ilivyokuwa katika Muswada wa Marekebisho wa Sheria za Hifadhi za Jamii, 2012 wakati huu, bado hakutakidhi kiu ya mabadiliko yanayohitajika ya Mfumo wa Sekta ya Hifadhi ya Jamii nchini kutoa mapendekezo ya marekebisho ya sheria kuhakikisha kwamba mifuko iliyoko kwenye sekta hiyo inalinda haki za wanachama kwa namna inayojitosheleza.