‘Watoto wa viongozi wasisome nje’

Baadhi ya wakazi wa Jiji la Dar es Salaam wameitaka katiba mpya itamke kuwa watoto wa viongozi wote wa nchi kusoma katika shule za serikali kuanzia ngazi ya msingi hadi elimu ya juu.

Walisema hayo jana, wakati wakitoa maoni ya katiba mpya mbele ya Tume ya Mabadiliko ya Katiba katika viwanja vya Shule ya Msingi Magomeni, jijini Dar es Salaam.

Joshua Mutale, alisema kwa kufanya hivyo itahamasisha umakini wa viongozi kuweka msisitizo katika suala la elimu hasa katika shule za kata kuliko ilivyo sasa.

“Kama kiongozi akisomesha mtoto wake katika shule za serikali kwa ngazi zote ni rahisi kuyatambua mapungufu yaliyopo katika shule hizo na kuyatatua kwa haraka,” alisema Mutale.

Christian Kauzeni, alisema endapo jambo hilo litawekwa katika katiba mpya na kufuatwa kama sheria litapunguza matabaka yaliopo kati ya shule za serikali na zile za binafsi.

Aidha, baadhi ya wachangiaji walipendekeza katiba ipige marufuku sviongozi wa serikali kutibiwa nje ya nchi na endapo ikitokea atapelekwa huko avuliwe uongozi kwa muda na atibiwe kama raia wa kawaida.

Suleimani Juma, alisema hatua hiyo itaepusha mikataba ya ubinafsishaji wa rasilimali za nchi kinyemela inayoweza kufanyika kupitia matibabu hayo.

Mutale alisema baadhi ya viongozi hutumia mwanya wa matibabu kusaini mikataba ya uwekezaji wa rasilimali muhimu zilizopo nchini.