Sakala la ARV feki latua kwa DPP

Waziri wa Afya na Ustawi wa Jamii, Dk Hussein Mwinyi 

SAKATA la dawa bandia za kupunguza makali ya Ukimwi (ARV) lililosababisha Mkurugenzi Mkuu wa Bohari ya Dawa (MSD) na wenzake wawili kusimamishwa kazi, liko kwa Mkurugenzi wa Mashitaka Nchini (DPP).

Hayo yalielezwa mwishoni mwa juma kwenye Kamati ya Bunge ya Kudumu ya Huduma za Jamii na Waziri wa Afya na Ustawi wa Jamii, Dk Hussein Mwinyi.
Dk Mwinyi alisema baada ya uchunguzi wa kina, suala hilo sasa limefikishwa kwa DPP kwa hatua zaidi.

“Tunasubiri uamuzi wa DPP baada ya wizara yangu kuchukua hatua za awali za kumsimamisha Mkurugenzi Joseph Mgaya, baada ya kubainika kuwapo na kusambaa ARV bandia,” alisema Dk Mwinyi.

Dk Mwingi alisema mbali na mkurugenzi huyo pia wizara yake iliwasimamisha kazi Mkuu wa Kitengo cha Udhibiti Ubora, Daud Maselo na Mkuu wa Kitengo cha Udhibiti Ubora wa Dawa, Sadick Materu. Pamoja na kuchukua hatua ya kusitisha Kiwanda cha TPI kuzalisha dawa hizo.

“Wizara iliwasimamisha kazi viongozi hao ili kupisha uchunguzi kufuatia kuruhusu kusambazwa kwa dawa bandia za kupunguza makali ya Ukimwi aina ya TT –VIR 30 katika vituo mbalimbali vya kutolea huduma za afya nchini. Sasa suala lao limeshafikishwa kwa DPP kwa hatua zaidi za kisheria, tunasubiri uamuzi wake,” alisema Dk Mwinyi.

Alisema pia wamepiga marufuku usambazaji na matumizi ya dawa aina ya TT –VIR 30 toleo namba 0C .01.85 inayotengenezwa na TPI, kutokana na dawa hiyo kutengenezwa chini ya kiwango na kutofaa kwa matumizi ya binadamu.

Alisema hatua hiyo ya wizara ilichukuliwa baada ya kubaini kuwepo kwa dawa hizo katika Hospitali ya Wilaya ya Tarime, kufuatia ukaguzi uliofanywa na Wizara ya Afya kupitia Mamlaka ya Chakula na Dawa Nchini (TFDA).

“Mheshimiwa mwenyekiti kufuatia ukaguzi na ufuatiliaji uliofanywa, pamoja na uchunguzi wa kimaabara ulibaini mengi ikiwa ni pamoja na nyaraka zilizokutwa MSD zinaonesha kuwa TPI kuiuzia MSD dawa hiyo bandia,” alisema.

Dk Mwinyi alisema Serikali inahakikisha kuwa dawa zenye ubora unaotakiwa za kupunguza makali ya Ukimwi zinaendelea kupatikana katika vituo vya kutolea huduma hiyo.