Operesheni usafi sasa kwenye daladala

Daladala 

HALMASHAURI ya Manispaa ya Temeke, jijini Dar es Salaam, ina mpango wa kupeleka operesheni  usafi kwenye mabasi ya daladala yanayotoa huduma ndani ya manispaa hiyo.

Hayo yalisemwa jana na  Ofisa Uhusiano wa Halmashauri ya Manispaa ya Temeke, Joyce Msumba alipokuwa akizungumza na mwandishi wa habari hii  kuhusu maendeleo ya operesheni ya kusafisha manispaa hiyo.

Alisema mpango huo unatokana na kukithiri kwa vitendo vya abiria wa mabasai hayo kutupa ovyo takataka hasa baada ya kukosa mahali pa kuhifadhi takataka hizo ndani ya mabasi hayo.

“Tutawaagiza madereva ili waweke vifaa vya kuhifadhi takataka  ndani ya mabasi yao, ili kuepuka mtindo wa abiria kutupa takataka ovyo,” alisema. Ofisa Uhusiano huyo alisema bila matumizi ya nguvu na vitendo , Jiji la Dar es Salaam halitaweza kuwa safi.
Msumba alisema halmashauri inalazimika kutumia mgambo ili  kuhakikisha kuwa watu wanafanya usafi katika maeneo yao.

“Kuna mama lishe ambao hawazingatii usafi kabisa katika maeneo yao ya biashara, unakuta mtu amefunga gunia chini kuna maji machafu yanatiririka lakini hawajali,” alisema
Alisema hata hivyo halmashauri itahakikisha kuwa hakuna watu watakofanya biashara za vyakula kando kando ya barabara kuu zilizo kwenye manispaa hiyo.

“Lakini kuna watu wengine wana tabia ya kutiririsha maji ya vyooni na kuyaelekezea kwenye mitaro jambo ambalo ni hatari kiafya kwani linaweza kusababisha magonjwa ya milipuko kama kipindupindu,” alisema.

Kwa kuonyesha kuwa wamedhamiria kufanya kile wanachokisema, Msumba alifafanua kuwa wanawatoza faini kati ya Sh20,000 hadi 50,000 kwa wale wanaokiuka taratibu za usafi.