Chadema yatishia kujitoa kwenye mchakato wa Katiba

Msemaji wa kambi ya Upinzani, Freeman Mbowe.

Chama cha Demokrasia na Maendeleo (CHadema), kimesema hakitashiriki katika mchakato wa Katiba Mpya endapo serikali haitapeleka bungeni Sheria ya Mabadiliko ya Katiba, ili kufuta vifungu mbalimbali kikiwamo kinachowaruhusu wajumbe wa Bunge Maalum kutoka Zanzibar kushiriki katika mijadala ya mambo yasiyo ya muungano.

Chama hicho kinataka marekebisho hayo kupelekwa bungeni kabla ya  mwisho wa Aprili na isipofanya hivyo kitajitoa katika ushiriki wake katika mchakato huo.

Hayo yalisemwa jana na Msemaji wa kambi ya Upinzani, Freeman Mbowe, alipokuwa akitoa maoni ya kambi hiyo kuhusiana na hotuba ya  bajeti ya Ofisi ya Waziri Mkuu  kwa mwaka 2013/2014.

Pia Mbowe ambaye ni Mbunge wa Hai, alisema chama chake kitajitoa katika ushiriki ikiwa serikali haitafuta uteuzi wa wajumbe wa mabaraza ya Katiba uliofanywa na Kamati za Maendeleo za kata.

Alisema wajumbe hao wafutwe na badala yake wajumbe wa mabaraza ya katiba ya wilaya wachaguliwe moja kwa moja na wananchi wa Kata husika bila kuchujwa na WDC.

Pia alisema wanataka kufutwa kwa vifungu vyote vinavyohusu mamlaka ya Rais kuitisha tena Bunge Maalum la Katiba baada ya Bunge hilo kuwa limeshapitisha Rasimu ya Katiba Mpya kwa lengo la kufanya marekebisho katika Rasimu kabla haijapelekwa kwenye kura ya maoni.

Aidha, alisema wanataka kufutwa kwa vifungu vyote vinavyohusu mamlaka ya kikatiba na ya kisheria yatakayoiwezesha Tume ya Taifa ya Uchaguzi kuendesha na kusimamia kura ya maoni.

Alisema Tume hiyo imeonekana kutoa taarifa kwa Rais Jakaya Kikwete na kutangaza wazi wazi kwamba haiwajibiki kwa Bunge kuhusu utekelezaji wa majukumu yake kwa mujibu wa Sheria.

“Zaidi ya kumtuma Naibu Katibu wa Tume, viongozi wa Tume kama vile Mwenyekiti, Makamu Mwenyekiti na wajumbe wa Tume wamekataa kuhudhuria vikao vya Kamati ya Bunge ya Katiba, Sheria na Utawala ili kuieleza Kamati juu ya utekelezaji wa majukumu yake kwa mujibu wa Sheria na Katiba ya Nchi,” alisema Mbowe.

Kwa upande wa wanafunzi waliofeli mitihani ya kidato cha nne mwaka jana, Mbowe alisema kambi hiyo inaitaka Serikali kueleza bungeni inampango gani wa kupunguza idadi hii ya watoto wanaobaki mitaani bila shughuli rasmi ya kufanya.