Wabunge wataka ripoti ya Ngwilizi bungeni

Spika Anne Makinda

Kufuatia taarifa kuwa ripoti ya Kamati ndogo ya Bunge ya Haki, Maadili na Madaraka ya Bunge huenda isiwasilishwe na kujadiliwa katika Mkutano wa 10 wa Bunge, baadhi ya wabunge waliochunguzwa na kamati hiyo kwa tuhuma za rushwa wamekuja juu na kusema lazima iwasilishwe ili kuweka mambo hadharani kwa sababu ripoti hiyo siyo mali ya watu binafsi.

Ripoti ya kamati hiyo kama itajadiliwa bungeni itaweka hadharani ukweli juu ya tuhuma za baadhi ya wabunge kutuhumiwa kwa rushwa ambazo ziliibuka wakati wa Mkutano wa Nane wa Bunge.

OLE SENDEKA

Mbunge wa Simanjiro (CCM), Christopher Ole Sendeka, akizungumza na NIPASHE alisema ripoti hiyo lazima iwasilishwe bungeni ili ibainishe ukweli wa tuhuma za rushwa kwa Wabunge waliotuhumiwa na kusababisha Kamati ya Nishati na Madini ivunjwe.

“Hatuoni sababu kwanini ibaki kuwa ripoti ya watu binafsi, tunamshauri Spika wa Bunge kama kweli kuna njama za kutaka isiwasilishwe bungeni ailete ili wabunge waijadili kubainisha ukweli,” alisema Sendeka.

Sendeka alilaumu kitendo cha Waziri wa Nishati na Madini, Prof. Sospeter Muhongo, kutokana na kuanza kujadili suala la ripoti hiyo nje ya bunge na kwamba kufanya hivyo ni kwenda kinyume cha sheria na haki za Bunge.

SELEMAN ZEDI

Mbunge wa Bukene, Seleman Zedi, alisema ripoti hiyo ni muhimu ikawasilishwa bungeni isomwe wazi kwa umma ili wapate kufahamu nini kilichomo ndani ya ripoti hiyo.

Zedi ambaye alikuwa Mwenyekiti wa Kamati ya Nishati na Madini, iliyovunjwa na Spika Anne Makinda, alisema Watanzania wanasubiri kwa hamu kujua kilichopo ndani ya ripoti hiyo hivyo kutowasilishwa bungeni itakuwa siyo kuwatendea haki.

CATHERIN MAGIGE

Mbunge wa Viti Maalum, Catherin Magige, alisema ana imani ripoti hiyo itawasilishwa bungeni na kwamba hawezi kutoa maoni yeyote kwa sababu hajui kilichomo ndani yake.

YUSUF NASIR

Mbunge wa Korogwe Mjini (CCM), Yusuf Nasir, alisema wananchi wasubiri ripoti hiyo isomwe na maamuzi yatakayotolewa na kwamba isipowasilishwa bungeni na kujadiliwa, yatakuwa ni maamuzi ya Kamati ya Uongozi ya Bunge.

MUNDE ABDALLAH

Mbunge wa Viti Maalum Munde Abdallah, alisema anachofahamu ni kuwa ripoti hiyo itawasilishwa bungeni kwasababu wabunge waliahidiwa na Naibu Spika, Job Ndugai, baada ya kushindikana kuwasilishwa katika mkutano uliopita.

“Ripoti isipowasilishwa tutahoji kwanini iwe hivyo wakati tumeahidiwa, tuna hamu sana ya kutaka kujua ukweli wa jambo hilo la rushwa,” alisema Abdallah.


Kamati  ndogo ya Bunge ya Haki, Maadili na Madaraka ya Bunge, iliyokuwa chini ya Mwenyekiti, Brigedia Jenerali Hassan Ngwilizi, ilipewa jukumu la kuchunguza tuhuma za baadhi ya wabunge kutuhumiwa kwa rushwa.

Hata hivyo tangu kamati hiyo imalize kazi yake na kuwasilisha ripoti Ofisi ya Spika,  umeibuka utata kutokana na kile kinachoelezwa kuwako kwa jitihada za kuikwamisha isiwasilishwe ili isiichafue serikali.

Hali hiyo inatokana na mgawanyiko  ulioibua makundi mawili makubwa yanayovutana kuhusu ripoti hiyo. Moja ukiongozwa na wabunge waliotuhumiwa na upande wa pili ukijumuisha wale wanaoipigia debe serikali katika sakata zima la sekta ya nishati nchini.

Ingawa kuna hali ya kutokueleweka kama ripoti hiyo itawasilishwa kwa ajili ya kujadiliwa au la, Katibu wa Bunge, Dk. Thomas Kashililah, juzi aliiambia NIPASHE kuwa Kamati ya Uongozi ya Bunge inatarajia kukutana Jumatatu ijayo, ikiwa ni siku moja tu kabla ya kuanza kwa mkutano huo.

Kamati uongozi inaundwa pamoja na  watu wengine, Spika wa Bunge, Naibu wake, Waziri Mkuu, wenyeviti wa kamati za bunge na Kiongozi wa Kambi Rasmi ya Upinzani Bungeni.

Kwa mwelekeo wa mambo, moto mkubwa unatarajia kuwashwa juu ya ripoti hiyo kwa kuwa wapo wabunge wanaotaka kusafishwa dhidi ya tuhuma ambazo wanaamini wamevalishwa kwa makusudi, ilahali upande wa serikali ukiamini kwamba kulikuwa na hujuma za chini kwa chini zilizosukumwa na vishawishi vya rushwa kukwamisha makadirio ya matumizi ya Wizara ya Nishati na Madini ya mwaka 2012/13 Julai mwaka huu.

Ripoti hiyo inasubiriwa kwa hamu kubwa na Watanzania ili kuweka mambo hadharani kuhusu wabunge wanaotuhumiwa kuhongwa na kampuni za mafuta ili wakwamishe Bajeti hiyo na kutaka kuwajibishwa kwa viongozi wa wizara hiyo Waziri wake, Profesa Sospeter Muhongo na Katibu Mkuu, Eliakim Maswi.

Habari ambazo NIPASHE imezipata kutoka vyanzo mbalimbali zinasema kuwa kumekuwa na juhudi nyingi za pande mbili zinazohusika na ripoti ya kamati ya Ngwilizi, mmoja ukitaka kombe lifunikwe, na mwingine ukitaka kila kitu kiwekwe wazi ili kulinda hadhi ya wabunge wanaotuhumiwa kwa rushwa.

Kabla na hata baada ya kuundwa kwa kamati hiyo kumekuwa na mgawanyiko mkubwa ndani na nje ya Bunge na serikali kuhusu kashfa hiyo hali ambayo iliibuka wakati wa mkutano wa nane wa Bunge la Bajeti na kusababisha mvutano mkubwa wa wabunge na ndani ya serikali.

Kuna taarifa ambazo hazijathibitishwa ambazo zinaeleza kuwa huenda ripoti hiyo isiwasilishwe na kujadiliwa bungeni kutokana na baadhi ya mambo kutokuwa sawa baada ya kamati ya Ngwilizi kukamilisha uchunguzi wake.

Habari zinasema kuwa baada ya kukamilika kwa ripoti hiyo, yameibuka makundi mamwili yanayovutaka. Moja linaitetea serikali ili ripoti hiyo iisafishe na lingine linataka haki itendeke kwa ukweli kuwekwa wazi na kujulikana.

Kundi linalotaka haki itendeke linaamini kama kuna waliohongwa wajulikane na kama siyo ukweli ujulikane kwa kuwa baadhi ya wabunge walilalamika na kutaka ripoti hiyo itolewe mapema kabla ya kuahirishwa kwa Mkutano wa Nane wakisema kuwa bila hivyo watakutana na hali ngumu katika majimbo yao kwa kuwa wamevunjiwa haki zao.

Ripoti ya kamati hiyo kama itawasilishwa na kujadiliwa mjadala mkali hautauepukika kutokana na kuwapo kwa mgawanyiko kwa kuwa kila upande utataka kuhakikisha kuwa unatendewa haki.

Ingawa majina ya wabunge hao bado haijatajwa rasmi na mamlaka zinazohusika na kupambana dhidi ya rushwa, lakini wakati wa mkutano wa Nane wa Bunge ilielezwa kuwa wabunge wanaotuhumiwa kupewa rushwa ni watano, kati yao watatu wanatoka Chama Cha Mapinduzi (CCM) na wawili wanatoka vyama vya upinzani.

CHANZO: NIPASHE