Ashangaa Uwanja wa Ndege Moshi kujengwa makazi

NAIBU Waziri wa Uchukuzi, Dk Charles Tizeba jana alikutana na madudu katika uwanja mdogo wa ndege wa Moshi baada ya kukuta sehemu ya kiwanja hicho imemegwa na kujengwa makazi ya watu huku timu ya wawekezaji utoka Ufaransa ikiwa njiani kuja kukagua uwanja huo kwa ajili ya ujenzi wa Chuo cha Marubani.

Dk Chizeba alishindwa kuvumilia na kusema Tanzania huenda ikapatwa na aibu wiki ijayo wakati timu ya wawekezaji hao itakapowasili wakiwa na ramani inayotofautiana na ile ya sasa.

Ujio wa Dk Tizeba, unatokana na ombi la Mbunge wa Moshi Mjini, Philemon Ndesamburo aliyetaka aende mkoani humo kujionea namna uwanja huo ulivyo katika hali mbaya.

Akiwa uwanjani hapo, Meneja wa uwanja huo, Francis Massawe alimweleza naibu waziri huyo namna Halmashauri ya Manispaa ya Moshi ilivyomega eneo la uwanja huo na kugawa viwanja vya makazi.

Naibu waziri huyo alishtushwa pia kukuta mnara wa kampuni moja ya simu ukiwa umejengwa karibu na eneo la uwanja na kuhoji ilikuwaje mnara huo ukajengwa hapo. Kutokana na utata huo, Dk Tizeba aliagiza kuitwa kwa Mkuu wa Idara ya Mipango Miji wa Halmashauri ya Manispaa ya Moshi, Alex Poteka na Ofisa Ardhi wake, Aloyce Msule ili wajieleza.

Akijieleza katika kikao hicho, Poteka alisema eneo la uwanja huo halijamegwa bali ni watu wamevamia eneo la dharura (Buffer zone) na kwamba ukubwa wa eneo hilo uko kwenye ramani ya mwaka 1996/97. Kauli hiyo ilionekana kumchefua Dk Tizeba aliyehoji ilikuwaje ramani mpya ya 1996/1997 wakati uwanja huo uko katika ramani kuu halisi tangu 1954, ikiwa ni miaka 43 nyuma.

Dk Tizeba alimwagiza Katibu Tawala Mkoa Kilimanjaro, Dk Feisal Issa, meneja wa uwanja, watendaji wa halmashauri na wale wa wizara yake kukutana na kumpa ramani halisi.

Naibu Waziri huyo alimtaka Ndesamburo kuwaelimisha wananchi wake ili wasipotoshwe baadaye kuwa yeye (waziri) amekwenda Moshi kuchafua hali ya hewa wakati suala hilo linaungwa mkono pia na mbunge wao.

Ndesamburo, alisema yeye yuko mstari wa mbele katika kupigania kurejeshwa kwa eneo hilo la uwanja na ni mmoja wa waliopaza sauti miaka ya 1990 uwanja ulipomegwa.

Alimsihi Dk Tizeba asiwaeleze watalaamu hao kuwa kuna tatizo la ardhi kiwanjani hapo kwani yatapatiwa ufumbuzi.

Ndesamburo alisema kujengwa kwa chuo hicho kutaboresha uwanja huo na kutatoa fursa za kiuchumi kwa vile watalii wanaokuja kupanda Mlima Kilimanjaro wangependa kushukia Moshi.